مراجعة هاتف الريلمي C1 – real me c1


لما نزل الريلمي C1 كان له ميزة تجعله يباع بشكل اكبر وهي أن الجهاز كان بمعالج سنابدراجون 450

ومع تغير المعالج السناب بدراجون في الريلمى C2 ليصبح معالج الميديا تك P22 … وبالرغم من ان المعالج هذا جاء بتكنولوجيا تصنيع 12 نانو بدل 14 اللي في السنابدراجون 450 وكمان الأداء الأقوى بطبيعة تردده الاعلى من السنابدراجون …. الا انه كان لازم على الشركه انها تركز على العديد من الجوانب الثانية وتطور فيها بشكل ملحوظ عشان الموبايل يفضل مكمل نجاح الموديل القديم من نفس النموذج واللى كان معتمد بشكل كبير على سمعة المعالج اللى كان معتمد عليه.

فهل الريلمى C2 قدر انه يقدم تجربة استخدام تضمنله انه يفضل مكمل نجاح ال C1 ويستحق الشراء ام لا..
دا اللى هقولك عليه في #البوم_ريفيو ريلمى C2

 الريلمى C2

مبدئيا لو انت حكمت على الموبايل انه مش كويس لمجرد وجود معالج ميديا تك .. ف لازم تعيد التفكير مره تانيه .. وكمان تنظر على تاريخ اجهزه اوبو من اول ال F7 ولحد ال F11 و وكيف ان اوبو بتخلى السوفتوير الخاص بالجهاز مستقر جدا مع معالجات ميدياتك ..

وبالرغم من انك غالبا مش بتحب معالجات ميديا تك مقلي الا أن تجربة الإستخدام في الأجهزه اللي قلت عليها جيدة جدا لدرجه تخليك تشك أحيانا ان المعالجات اللى فيها سنابدراجون

ف قبل ما نبدأ الريفيو اريدك ان تتجاهل شعورك تجاه ميدياتك وتحكم على الموبايل هذا كحالة  لوحدها كإنك جربته من غير ما تعرف ايه نوع المعالج اللى فيه من الأساس عشان تقدر تقييم الجهاز بشكل حيادى بعيد عن تفضيلاتك ..

خلينا نبدأ بمحتويات علبه الريلمي c2 اللى مش كتيره

– موبايل ريلمى C2
– شاحن عادى مش سريع 5 فولت و 2 امبير
– وصلة Micro USB
– دبوس للشريحة
– سكرين للشاشه “ملزوقه على الموبايل”

نعم فقط هكذا  .. و عارف ان مفيش لا جراب ولا سماعه
وسوف نتكم عن هذه النقطه في زتونة الريفيو فى الأخر

محتويات علبة موبايل ريلمى C2

تصميم موبايل الريلمي c2

لما تمسك الجهاز اول مره هتلاحظ على طول اختلاف النوتش عن ال C1 و اللى بقت زى باقى اجهزه اوبو وريلمى بالشكل الانسيابى بتاعها

حواف الشاشه مقبوله على جميع الجوانب ولكن كبيره شويه من تحت ولكن دا عموما مقبول في الفئة السعريه دى ..

النوتش اللى فوق هتلاقى فيها الكاميرا وسماعة المكالمات اللى صوتها عالى وواضح جدا و كمان مستشعرات الإضاءة و القرب ..

على يمين الجهاز هتلاقى زرار الباور الكبير شويه عن ازرار الصوت اللى على الشمال و اللى بتكون تحت منفذ الشرائح وكارت الميمورى ..

اما في فريم الجهاز من تحت هتلاقى مدخل الشاحن ال Micro USB العادى و على يمينه مدخل السماعه والميكريفون و على الشمال الاسبيكر بتاعة الجهاز .. و اللى مكانها الحقيقه مش حلو و هتلاقى نفسك غالبا بتقفلها ب ايدك لو كنت ماسك الجهاز بالعرض

 

تصميم موبايل الريلمي c2

لما تمسك الجهاز اول مره هتحس ان الظهر خشن و الجهاز مش بيتزحلق من ايدك .. ولما هتبص على ظهر الجهاز هتلاقى واحد من افضل التصاميم اللى عملتها ريلمى في أجهزتها الحقيقه 🤩

ظهر الجهاز و الفريم كله حته واحده Unibody من البلاستيك .. والظهر منقوش عليه مثلثات .. المثلثات دى لو ركزت فيها هتلاقى جواها خطوط محفورة صغيره جدا بتتحكم في انعكاس الضوء كل ما تحرك الموبايل .. وهتلاقى نفسك كل شويه تمسك الموبايل و تفضل تحركه عشان تتفرج عليها 🤩

وبسبب التصميم الجديد الغير لامع دا .. بقى فيه عندك 3 مميزات بنفتقدهم في اجهزه ريلمى عموما ..
1- ظهر الجهاز مش بيبصم
2- الظهر صعب جدا جدا انه يتخربش وتقدر تستخدمه من غير جراب من غير ما تخاف عليه حرفيا
3- لما تكون ماسك الجهاز في ايدك مش بيتزحلق بسهوله

عجبنى كمان الإطار اللى لونه فضى اللى حوالين الكاميرات واللى بارز بشكل بسيط جدا عن الظهر وكمان كلمة ريلمى اللى مكتوب بالعرض

الحقيقه انا حابب التصميم دا جدا ومستغرب ان ريلمى قررت انها تنزله في جهازها الإقتصادى .. ومنزلتهوش في اجهزه تانيه اهم زى الريلمى 3 او الريلمى 3 برو مثلا ..

التصميم شكله حلو فعلا ومفهوش العيوب اللى كنا بنشتكى منها زى الخرابيش او البصمات اللى بتظهر على الجهاز بسهوله .. ف أتمنى ان ريلمى تنزله في اجهزه تانى في المستقبل

تصميم موبايل الريلمي من الخلف

شاشة موبايل الريلمي c2

الريلمى C2 بيجى بشاشه بحجم 6.1 بوصه IPS محمية بطبقة حمايه جوريلا جلاس 3 وبتيجى بنسبة ابعاد 19.5:9 و بدقة HD+ وبالنوتش الانسيابيه زى اللى في اجهزه ريلمى عموما ..

دقة الشاشه بالنسبه لحجمها تعتبر كويسه جدا ومش هتلاحظ بيكسلات الشاشه الا لو انت مقربها جدا لعنيك لكن عموما الشاشه الوانها كويسه ومتوازنه جدا .. سطوعها كمان كويس.. ولكن لو انت بره البيت الصبح وواقف في الشمس هتحس انك عاوز تضلل على الشاشه ب ايدك عشان تشوف اللى مكتوب عليها بسهوله ..

زوايا الرؤيه بتاعة الشاشه كويسه جدا ومش بتلاحظ تغير كبير في الألوان الا اللون الأسود اللى بيكون افتح شويتين لو بصيت للشاشه من على الجنب .. ولكن عموما الموضوع مقبول وطبيعى جدا في الفئة السعريه دى

الاتصال وشبكات الهاتف لموبايل ريلمي c2

 

الموبايل بيقدر يشغل شريحتين 4G في نفس الوقت وكمان تقدر تحط معاهم كارت ميمورى لان الكارت ليه مكان منفصل عن الشريحتين

صوت سماعة المكالمات كويس جدا و عالى واشارة الوايفاى ممتازه جدا وكمان الشبكة بتاعة الجهاز كويسه جدا ولكن ال GPS بالرغم من انه بيلقط بسرعة ودا كويس الا انه مش دقيق قوى وفيه نسبة خطأ بسيطه

الجهاز كمان فيه باقى المستشعرات اللى هتحتاجها زى البوصله و الجايروسكوب مستشعر التقارب وخلافه

الاتصال وشبكات الهاتف

بطارية هاتف Real me c2

تعالا بقى نتكلم عن البطاريه ودى الحقيقه من اقوى الحاجات اللى في الجهاز حرفيا 💪

الريلمى C2 بيجى ببطاريه 4000 ميللى امبير .. وبما انه موبايل اقتصادى و المواصفات الداخليه بتاعته مش عاليه ومش بتستهلك طاقه كتير .. ف عمر البطاريه حاجه رهيبه جداا جدا 😮

بص لو انت استخدامك تقيل .. لو اتشقلبت يادوب هتخلص بطارية الموبايل في يوم 

ولو استخدامك متوسط البطاريه ممكن تفضل معاك يومين كاملين بدون اى مشاكل

ولو استخدامك خفيف واغلبه مكالمات بس ف انت حرفيا ممكن تسافر لمدة 4 او 5 أيام من غير ما تاخد شاحن الموبايل معاك :”D

للأسف سوفتوير اوبو و ريلمى مش بيظهر ال screen on time ولكن بالجهاز دا انت تقدر توصل ل 10 او حتى 12 ساعه من وقت تشغيل شاشة الموبايل بدون اى مشاكل 👌👌

ولكن خيبة الامل الوحيده فى موضوع البطاريه دا هو سرعة الشحن لان الجهاز مش بيدعم الشحن السريع والشاحن اللى معاه في العلبه ال 2 امبير بيشحن الموبايل من 0 ل 100% فى مده تتراوح مابين ساعتين ونص ل 3 ساعات على حسب بتستخدم الموبايل ولا لأ …

مدة الشحن للأسف طويله نسبيا .. ولكنها بردو اتحسنت عن ال C1 اللى كان بيجى بشاحن 1 امبير ..

ولكن بشكل عام دا الطبيعى فى الفئة السعرية دى

 

بطارية real me c1

واجهة مستخدم ريال مي c1

موبايلات أوبو و ريلمى بتيجى بواجهة Color OS .. ال C1 كان بيجى بالإصدار الخامس منها .. ولكن ال C2 بيجى بالإصدار السادس من الواجه اللى مبنى على اندرويد 9.0 واللى فيها تحسينات كتير وتغيرات في التصميم عن الإصدار اللى فات من الواجهه..

من ابرز الحاجات اللى اتغيرت في الواجهة دى كانت ان بقى فيه اختيار لتشغيل درج التطبيقات App Drawer وكمان الإشعارات دلوقتى بتظهر فوق جنب النوتش وشكل الواجهه عموما مبقاش شبه ال iOS زى الأول ..

الواجهه عموما ماليانه بالمميزات اللى بتقدر منها تتحكم في التليفون و تخصص شكله زى ما انت عاوز .. منها مثلا

– فيه جزء خاص بال Security في الإعدادات و دا بتقدر تعمل منه حاجات كتير .. تقدر تعرف التطبيقات اللى عندك واخده صلاحيات على ايه في التليفون وكمان تقدر تقفل التطبيقات اللى عاوزها ببصمة الوش

– الواجهه كمان فيها Screen off gestures .. زى مثلا لما تلمس الشاشه مرتين تنور او تقفل .. وكمان ممكن ترسم دايره عشان تفتح الكاميرا .. او ترسم حرف V عشان تشغل الفلاش .. والحلو بقى انك تقدر تعمل gestures خاصه بيك بالشكل اللى انت عاوزه عشان تفتح التطبيق اللى انت تحدده بردو

– فيه كمان gestures ممكن تعملها و الشاشه شغاله زى مثلا انك تحرك 3 صوابع على الشاشه من فوق لتحت عشان تاخد سكرين شوت .. او تحركهم من تحت لفوق عشان تشغل ميزة ال Split screen وتفتح برنامج تانى في نفس الوقت ..

– ممكن كمان تلغى ال 3 ازرار بتوع اندرويد اللى تحت دول و تستخدم مكانهم ال gestures عشان تستفيد من حجم شاشة الجهاز كلها .. والحلو هنا ان الواجهة فيها اكتر من اختيار لـ gestures مختلفه عشان تختار منها اللى يريحك اكتر و الحلو كمان انهم ضافوا فيها ال Gestures الأصليه بتاعة اندرويد و تقدر تختارها و تستخدمها عادى

– فيه كمان ميزه اسمها Smart Sidebar ودا زى شريط بتسحبه من على يمين الشاشه بتلاقى فيها اختصارات لبرامج عندك على الموبايل أو أدوات ممكن تخصصها على حسب احتياجاتك .. ف ممكن تحط فيها الفيسبوك والواتساب و كمان اختصارات لحاجات تانى زى انك تاخد سكرين شوت او تسجل الشاشه و خلافه

– الواجهه فيها حاجه اسمها Game Space واللى من خلالها الواجهة بتقدر تعرف انك فتحت لعبه و تحاول انها تقلل من العمليات اللى في الخلفيه عشان تدى كل أداء الجهاز للعبه .. وكمان بتديها اولويه في اتصال الانترنت خصوصا لو بتلعب لعبه اونلاين زى PUBG مثلا .. دا غير ان لو جاتلك مكالمه وانت بتلعب بتلاقيها طلعت في مكان صغير زى Window كدا تقولك فيه مين اللى بيتصل من غير ما توقف اللعبه ..

—–

وبالرغم من الواجهة الجديده دى و المميزات اللى ضافوها فيها الا ان مازال فيه شويه حاجات لاحظتها مش حلوه زى مثلا تعامل الواجهة العنيف مع البرامج المفتوحه وقفل البرامج اللى في الخلفيه بعد شويه من وقت عدم استخدامها .. ولكن تقدر تقلل من الموضوع دا بشكل كبير من خلال انك تقفل اختيار ال Smart Power Saver من اعدادات البطاريه ..

دا غير ان عندى شويه تحفظات على شكل الإختصارات الجديده المربعه الموجوده في منطقة الإشعارات و اللى اعتقد محتاجه انها تتعدل بشكل ما عشان شكلها يكون افضل شويه

عموما أداء الواجهه بكل المميزات بتاعتها دى يعتبر تقيل حاجه بسيطه
على مواصفات التليفون .. ممكن تلاحظ بعض البرامج بتاخد شويه وقت عشان تفتح وكمان شويه تقطيع في الانميشن في بعض الأحيان ولكن الجهاز بيفضل شغال و بيعمل الحاجه المطلوبه منه بدون تهنيج او وقوف تام

واجهة مستخدم الريل مي c1

اداء الريل مي c1

الريلمى C2 يأتي بمعالج ميدياتك P22 .. وهذا المعالج ثماني النواه بتردد 2.0 جيجاهيرتز مع 3 جيجا رام و كمان معالج رسوميات PowerVR GE8320

الحقيقه ان أداء الجهاز مش متميز كعادة الأجهزة اللي في هذه  الفئة السعرية.. وسرعة فتح التطبيقات ليست اسرع شيء.. وهذا ايضا العادى في هذه الفئة السعرية.

المميز في الجهاز انك لما بتقفل اختيار توفير الطاقه الذكي الموبايل بيقدر انه يحتفظ بالبرامج المفتوحه بشكل جيد في الرام من غير ما يقفلها ولما بترجعلها بتلاقيها واقفهة على اللى تركته عليها .. وطبعا هذا  لا يكون مع عدد كبير من البرامج ولكنه مازال يعطي اداء مقبول جدا نظرا لحجم الرام ال 3 جيجا اللى في الجهاز.

اداء الريل مي c1
اما المعالج الرسومى PowerVR GE8320 ف اداءه في الألعاب الخفيفه و المتوسطه جيد جدا .. انما الألعاب الثقيلة مثل  PUBG لم تكون افضل تجربة  .. وسوف تضطر الى تنزيل اعدادات جرافيكس اللعبه لأقل شيء حتى تستطيع ان تلعب بشكل جيد ووقتها تقريبا لن تلاحظ الدروب في الفريمات اللي بتقع الا نادرا .. ف عموما الجهاز مناسب للألعاب المتوسطه و الخفيفه عن الألعاب التقيله اللى مثل بوبجي موبايل Pubg
بوبجي على هاتف ريلمي c1

الكاميرا السيلفى في الريملى C2

فهي بدقة 5 ميجابيكسل .. ومثل ما انتوا عارفين الدقه لا تعتبر مقياس لجوده الكاميرا لانها مقياس لمساحة الصورة ليس الا..

ولذلك اللى فاجئنى هنا ان الكاميرا السيلفى في الموبايل تعطي صور بجودة جيدة جدا لدرجة انها تكون كافيه ان الموبايل يستخدمها فى ال face unlock و يفتح بشكل سريع جدا.

على اي حال صور الكاميرا في الصباح والشمس جيدة جدا بتفاصيل اكتر من مقبوله .. انما في ظروف الإضاءه العاديه ستجد الصور ناعمة و ظاهر فيها نويز وغباش  في جميع انحاء الصورهوليس في المناطق المظلمة فقط .. الموضوع مش ظاهر الا لما تعمل زوم عالي ولكنه موجود ..

وضع البورتريه في الكاميرا السيلفى بيقدر انه يعزل الخلفيه بشكل اكثر من مقبول .. وكمان ال HDR يعطي نتائج احسن شويه ولكن ليس بفرق كبير ..

كلامى على الكاميرا يظهر انه وحش ولكن الكاميرا لو قارنتها بالفئة السعريه اللى فيها الجهاز هتلاقى انها تنتج جوده صور تكاد تتفوق بيها على باقي التليفونات اللى في هذا  السعر.

الكاميرا السيلفى في الريملى C2 

الكاميرات الخلفية لهاتف ريل مي c1

الأولى 13 ميجابيكسل بفتحة عدسة f2.2 والتانيه 2 ميجابيكسل خاصه بعزل الخلفية

ووضع البورتريه ..

– لو بتصور في ظروف اضاءو قويو أو في النهار و الشمس طالعة،  الصور اللى بتطلعها الكاميرا بتكون جيدة جدا بتفاصيل أكثر من توقعات تك كوميكس الحقيقة .. ولما بتشغل ال HDR الصور بتكون افضل شويه خصوصا في ظروف الإضاءه اللى فيها تباين كبير ولكن التحسن عموما مش كبير ..

ومن الحاجات اللى استفاد بيها الموبايل دا من الواجهه الجديده هي وضع ال Chroma boost اللى بيزود فيه تشبع الألوان و بيخلى الصوره مرضيه للعين اكتر

– أما بقى فى ظروف الإضاءه المتوسطه و القليله بتبدأ تلاحظ النويز وكمان الصور الانعم .. ولكن الصور عموما مقبولة تظل مقبوله جدا جدا وتقدر تستخدمها على السوشيال ميديا بدون اى مشاكل ..

بخصوص الفيديو ف الموبايل بيقدر يسجل فيديوهات بدقة 1080p ب30 فريم في الثانيه وبيقدر كمان يسجل فيديوهات Slow Motion بمعدل 120 فريم في الثانيه والحقيقه جودتها مش افضل حاجه

أداء الكاميرا عموما فى المتوسط كتقييم عام … ولكن كتقييم مقابل الخيارات المتاحه في نفس الفئة السعريه دى اعتقد ان الموبايل بيقدم أداء متميز جدا فيها يكاد يتفوق على باقى الاجهزه المنافسه ليه

هتلاقى هنا امثله لصور كاميرا الموبايل

الكاميرات الخلفيه لهاتف ريل مي c1

الزتونة بقى .. مميزات وعيوب الجهاز

* نبدأ بالعيوب اللى كنت أتمنى عدم وجودها
– الجهاز مفهوش مايك تانى لعزل الضوضاء “عادى فى السعر دا” بس حبيت انبهك ليها
– ديزاين الإختصارات اللى في منطقة الإشعارات كان ممكن يكون افضل 
– مدة شحن الجهاز الطويله نسبيا بس لاتزال افضل من ال C1 اللى كان بيجى بشاحن 1 امبير
– الجهاز مش بيجى معاه جراب و دا غريب على الفئة السعريه دى خصوصا ان الجهاز مش معاه سماعه أصلا
– صوت سماعة الجهاز رفيع شويه .. و تقدر تقول انه متوسط من حيث الجودة ومستوى الصوت
– الجهاز مفهوش لمبة اشعارات
– افتقاد الجهاز لمستشعر البصمه والحقيقه دى ميزه مهمه دلوقتى وفيه ناس كتير بتدور عليها في الموبايل اللى عاوزين يشتروه
– صعوبة قراءه شاشه الموبايل بسهوله في اشعة الشمس المباشره
– مكان سبيكر الجهاز من تحت على الشمال واللى غالبا هتقفله ب ايدك لو مسكت الجهاز بالعرض

————

*اللى عجبنى فى الجهاز بقى كان
– ديزاين الظهر اللى أتمنى اشوفه في اجهزه اكتر من ريلمى لانه مش بيتزحلق ولا بيتخربش ولا بيبصم وكمان شكله حلو وبيتغير مع زاوية الإضاءه
– أداء البطاريه
– الشاشه محمية بطبقة حمايه جوريلا جلاس 3
– وجود منفذ منفصل لكارت الميمورى
– سرعة ال Face unlock كانت اعلى من التوقعات خصوصا مع عدد الميجابيكسل القليل نسبيا للكاميرا السيلفى
– استفادة الجهاز من مميزات الواجهه الجديده زى وضع الكروما بوست و وجود درج التطبيقات
– أداء البطاريه كمان مره
– حجم النوتش الصغيره

الخلاصه من الأخر هى ان الموبايل دا موجود فى مصر بنسخه واحده بس و هي ال 3 جيجا رام مع ذاكره 32 جيجا ..

ومع تسعيرها ب 2290 جنيه ف الجهاز بيقدم قيمه مقبوله مقابل السعر وتجربة استخدام مناسبه لتوقعات الناس اللى بتشترى موبايل في الفئة السعريه دى ولكنى كنت اطمع فى انه يكون ارخص شويه او يادوب اعلى من ال 2000 جنيه بحاجه بسيطه كان هيقدم قيمه اكبر مقابل السعر ..

عموما الجهاز بيميزة شويه حاجات عن المنافسين زى جودة الصور اللى طالعه من الكاميرا الاماميه او الخلفيه .. و أحيانا حجم الرام الأكبر من المنافسين … ولكن يبقى حاجه واحده هي اللى هتخلى نسبه كبيره من الناس تعيد التفكير قبل ما تشترى الموبايل دا وهى عدم وجود البصمه اللى تعتبر عنصر مهم في اختيار ناس كتير لموبايلاتها ..

فلو تهمك البصمه جدا انت غالبا هتبعد عن الجهاز دا .. انما لو كدا كدا مش فارقه معاك و ممكن تكتفى ببصمه الوش او حتى الباسوورد عادى ف الجهاز بيقدم قيمه مقبوله جدا مقابل السعر مع شويه تمييز في الكاميرا عن بقية المنافسين ..

انا كدا خلصت .. لو عندك اى اسئله بخصوص الموبايل اكتبها في التعليقات و هرد عليك على طول ان شاء الله

ريل مي c هل يتحق الشراء ؟

Like it? Share with your friends!

1

Comments 0

لن يتم نشر عنوان بريدك الإلكتروني. الحقول الإلزامية مشار إليها بـ *

مراجعة هاتف الريلمي C1 – real me c1