شاومي MI9T هل يستحق الشراء – مراجعة شاملة


هو الحقيقه شاشة AMOLED بتدعم ال HDR مع معالج سنابدراجون 730 و 6 جيجا رام  في MI9T ال3 حاجات دى كافيه انها تخليك تدفع 6000 جنيه في اى موبايل و انت راضى جدا ..

وبما ان ال Mi9T فيه ال 3 حاجات دى فتقدر انك تقول انه يستحق الرقم دا فعلا بس تجربه الموبايل مش مجرد ال 3 حاجات دى وخلاص .. أداء الكاميرات و البطاريه و البيلد كواليتى و السوفتوير كلها بتكمل تجربتك للموبايل…

ف هل ال Mi9T قدر انه يقدم كل الحاجات دى بمستوى كويس وقدر انه يقدم تجربه مستخدم مميزه تخليه هو الاختيار الوحيد في الفئة السعريه دى ولا لأ ؟

من اول ما نزل ال K20 وال K20 برو في الصين وبيجيلنا اسئله “هو جهاز الk20  هذا متى سيتم اصداره ؟ 🤔

لكن قبل ما ندخل في التفاصيل سوف اوضح لك في البداية أن الموبايل اسمه K20 ولا Mi9T ام ماذا بالضبط 🙄

الحقيقه ال K20 هو هو ال Mi9T .. وهما مجرد اسمين لنفس الجهاز .. لكن المشكلة هنا، انك عندما ترى اسم الـ Mi9T ستتذكر موبايل شاومى ال Mi9 .. و الحقيقهان هذا جهاز و ذاك جهاز اخر بشكل تام و من كثر الاختلافات بينهما  كان المفروض ان ال K20 ينزل بنفس اسمه من غير اي تغيير ويبقى Mi9T اصلا :D.

وفي اعتقادي أن الجهاز تم تسميته بالإسم هذا حتى يعتمد تسويقيا على النجاح اللذي عمله ال Mi9 ليس الا ..

اما ال حرف T هذا فليس له اي محل من الإعراب .. اي حرف حتى يبقى الاسم مختلف عن ال Mi9 وهكذا 😂

او كما قالت شاومي T اختصار ل Trending

Mi9T شاومي

 

علبة هاتف شاومي Mi9T

في الأول خلينى اقولك ايه اللى هتلاقيه في علبه الموبايل لما تفتحها
– الموبايل
– شاحن سريع 18 وات “اخيرا يا شاومى” 😂
– وصلة Type-C
– دبوس للشريحة 
– جراب اسود بلاستيك مطفى ملمسه حلو جدا
– كتالوجات وحاجات كدا
وللأسف الجهاز مبيجيش معاه سماعه كالعاده .. ولا حتى سكرينه ملزوقه على الشاشه .. بس وجود الشاحن السريع عوض الموضوع دا الحمد لله 👌

تصميم موبايل شاومي Mi9T

مبدئيا كدا لو انت مش عارف ان فيه موبايل اسمه Mi9T و حد غمالك عنيك واداك الموبايل وقالك من البيلد كواليتى اللى حاسسها تقدر تحمن سعر الجهاز؟؟

هترد بسهوله جدا و هتقوله ان دا جهاز فلاجشيب يتعدى ال 10 تلاف جنيه ! 😮

الموبايل حرفيا انت مش بتحس معاه بإن معاك جهاز من فئة متوسطه .. فريم الجهاز المعدن الناعم وكمان الزجاج الخلفى اللى واخد كيرف قوى من على اليمين و الشمال وكمان كيرف بسيط من فوق وتحت .. اللى بيخلى مسكة الموبايل مريحه جدااا جدا .. دا بجانب وزن الموبايل التقيل نسبيا كل دا هيحسسك ان الموبايل دا مصروف عليه كأنه جهاز فلاجشيب فعلا 👌

ال Mi9T وكمان ال Mi 8 Lite دول اعظم جهازين في البيلد كواليتى نزلتهم شاومى في الفئة المتوسطه

و الحقيقه انبهارك بالبيلد كواليتى مش هيقف عند كدا وبس .. لانك لما هتشوف شاشة الموبايل ال AMOLED اللى بحواف شبه منعدمه وكمان من غير خرم للكاميرا او نوتش هتنبهر اكتر.. حتى الحافه اللى فوق صغيره جدا لان مستشعر الإضاءه و القرب بقوا تحت الشاشه نفسها 

وبالتالى الحافه اللى فوق تقدر تقول انها صغيره جدا زى الحواف اللى على الجنب و دا بيخلى فيه سميتريه في تصميم الجهاز بتخليك حابب انك تستخدمه طول الوقت

والحقيقه انا اكاد اجزم ان دا افضل جهاز كبيلد كواليتى في الفئة السعريه دى

تعالا نتكلم بقى عن الألوان .. الموبايل دا نازل ب 3 الوان الأزرق و الأحمر و الأسود ..

الأزرق و الأحمر نازلين بتأثير غريب بيظهر مع الإضاءه على جوانب الموبايل .. عامل زى شعلة النار وواخد جنبين الجهاز من فوق لتحت و التأثير دا بيتلاشى تدريجيا كل ما تبص على نص الظهر بتاع الموبايل ..

و الحقيقه انا مش عاجبنى طريقه انعكاس الإضاءه دى .. بحس انها عشوائيه جدا ومش بتخلى شكل الموبايل حلو ولا حاجه 
“الموضوع ازواق طبعا وفيه ناس هتحب انعكاس الاضاءه دا” ولكن دا رأيي لو مش عاجبك فهو لا قيمه له على الإطلاق عادى :”D

اللون الأسود من الجهاز بقى مش بيجى بالتأثير دا .. بيجى بتأثير تانى احلى بكتير و هو الكاربون فايبر و اللى بيكون ظاهر على الجوانب اكتر و بيتلاشى في النص و الحقيقه اللون الأسود شكله انيق اكتر و بريميم عن الألوان التانيه الأحمر و الأزرق ..

ماعلينا من موضوع اللون .. في ظهر الموبايل هتلاقى ال 3 كاميرات .. اللى من فوق دى الكاميرا ال Telephoto وبتكون في دايره لوحدها بارزه بشكل بسيط جدا عن ظهر الموبايل

اما تحتها الكاميرا الاساسيه و الكاميرا ال Wide angle الاتنين في فريم لوحدهم والفريم دا بارز بشكل اكبر عن الكاميرا التيلى فوتو اللى فوق .. و دا استغربته جدا الحقيقه .. ولكن على اى حال الجراب اللى مع الجهاز بيحمى ال 3 الكاميرات بدون اى مشاكل

على يمين الجهاز هتلاقى ازرار الصوت وزرار الباور و من فوق هتلاقى مكان خروج الكاميرا الأماميه وكمان المايك التانى بتاع عزل الضوضاء و أخيرا ال 3.5 audio jack الحمد لله :”D

اما في فريم الجهاز من تحت هتلاقى ال USB-C وعلى يمينها المايكروفون السماعه و على شمالها درج الشرائح

شاشة هاتف Mi9T

تعالا بقى اقولك على الشاشه .. عشان الحقيقه دى من اهم النقط اللى هتخلى الموبايل يتباع اكتر من غيره ..

شاشة الموبايل هنا بحجم 6.4 بوصه و بأبعاد 19.5:9 و محميه بطبقة حماية جوريلا جلاس 5 ولكن المميز هنا في الشاشه حاجتين

1- الشاشه نفسها AMOLED مش IPS وكمان بتدعم ال HDR و دى حاجه كويس انها بدأت تظهر في الفئة السعريه دى من شركات تانى غير سامسونج ..

2- بسبب تصميم الكاميرا اللى مدفون جوا الموبايل ف الشاشه هنا مفهاش نوتش او خرم .. شاشه كامله بحواف شبه منعدمه .. و حتى الحافه السفليه الكبيره عن باقى الحواف تظل صغيره لانها قد حافة ال Galaxy S10 تقريبا .. ف الشاشه تقدر تقول انك هتقع فى غرامها من اول نظره 🥰😂

وبما ان الشاشه اموليد ف الوانها مشبعه شويه عن الشاشه ال IPS .. واللون الأسود بيظهر اسود تماما .. وكمان الوان الشاشه و سطوعها مش بيختلفوا مهما كانت الزاويه اللى بتبص بيها على الموبايل

وأخيرا سطوع الشاشه في الشمس جيد جدا ويصل للمتاز و بتقدر تسخدم الجهاز عادى بدون اى مشاكل

من الاخر شاشه الموبايل هنا مالهاش اى مثيل في السعر دا الا من اجهزه سامسونج اللى بتيجى بشاشات AMOLED ف عاش شاومى على الشاشه دى

—–

اما بقى بخصوص البصمه اللى في الشاشه .. ف الحقيقه لو انت قررت انك تجيب الموبايل انصحك انك لما تفتحه توصله على الوايفاى وتنزل الابديت اللى موجود لانه بيفرق في أداء البصمه جدا ..

البصمه اللى في الشاشه هنا هي بصمه Optical بتعتمد انها تاخد صوره ثنائيه الابعاد لبصمتك وتقارنها باللى مسجلها على الموبايل عشان يفتح

والحقيقه أداء البصمه هنا افضل من المتوسطه ويوصل للجيد كمان
لو بتقارنها بسرعه البصمه على اجهزه سامسونج زى ال a50 ف تأكد تماما ان البصمه في ال 9T تجربه مختلفه تماما و ادق و اسرع بكتير من تجربتها في السامسونج وبفرق كبير كمان

البصمه بتفتح في وقت مش كبير وتقدر تعتمد عليها وتستخدمها عادى بدون اى مشاكل .. ولكن خليك عارف ان لو صباعك مبلول او مش نضيف غالبا الجهاز مش هيفتح معاك من اول مره

 

الاتصال والشبكات في هاتف MI9T

ال Mi9T بياخد شريحتين وبيقدر يشغلهم 4G في نفس الوقت .. شبكه الموبايل كويسه جدا وصوت المكالمات ووضوحها كويس جدا وهتسمعه في اغلب الظروف

لكن المشكله هنا هي ان الموبايل مش بيركب فيه كارت ذاكره و دا الحقيقه كان قرار مش حلو من شاومى ولذلك بنصح الناس اللى هتجيب الموبايل لو يهمها موضوع المساحة الداخليه تجيب النسخه ال 128 عن النسخه ال 64 جيجا

على اى حال أداء ال GPS ممتاز زى ما متعودين من الأجهزة اللى بمعلجات كوالكوم .. وكمان الموبايل فيه كل المستشعرات اللى هتحتاجها .. زى البوصله و الجايروسكوب ومستشعر التسارع و خلافه

بطارية هاتف شاومي mi9t

ال Mi 9T بيجى ببطاريه 4000 ميللى امبير .. والموبايل كمان بيدعم الشحن السريع 18 وات
البطاريه هتفضل معاك في حدود 6 ساعات من وقت تشغيل الشاشه لو استخدامك تقيل و اغلبه العاب .. انما الاستخدام المتوسط هتوصل معاك ل 8 ساعات سكرين اون تايم بدون اى مشاكل ..ف البطاريه هنا هتفضل معاك لأخر اليوم عادى جدا و هيكون لسه متبقى منها شويه كمان ..

الموبايل كمان استهلاكه لا يذكر على ال StandBy Mode ولو استخدامك خفيف جدا للموبايل ويادوب مكالمات بس ف انت تقدر تفضل بيه 3 أيام عادى جدا بدون اى مشاكل
نيجى بقى للشحن و الحمد لله ان شاومى حنت علينا بشاحن سريع في العلبه  واللى بيجى بقدرة 18 وات وقدر يشحن الموبايل
فى نص ساعه من 0 ل 40%
وفى ساعه قدر يشحنه 80%
و من 0 ل 100% فى اقل من 95 دقيقه
ودى مدة شحن كويسه جدا ..
اينعم مش هي الأفضل في الفئة السعريه دى ولكنها تظل كويسه جدا ..

واجهة مستخدم mi9t

الشاومى Mi9T بيجى بإصدار اندرويد 9.0 ولكن بواجهة شاومى MIUI و تحديدا الإصدار العاشر منها .. الحقيقه انا شرحت قبل كدا واجهة شاومى دى في اكتر من ريفيو قبل كدا ف لو انت عارفها سيب
الجزء دا وخش على اللى بعدهمبدئا الواجهه ماليانه انميشن في كل حاجه .. حتى لما تحرك برنامج على الهوم سكرين من مكان للتانى هتلاقى باقى البرامج بتعمل حركه كدا لما تشيل صباعك من ع الشاشه ..

والحقيقه كتر الانميشن دا بالرغم من انه بيحببك في الواجهه الا انه أحيانا بيكون سبب في تقلها او حتى ظهور بعض المشاكل فيها .. ودا هقول عليه فى الأخر بس خلينا نبدأ بأهم المميزات اللى موجود في واجهة شاومى MIUI
– ميزة ال Dual Apps اللى بتخليك تعمل نسختين من نفس البرنامج و الموضوع هنا ممكن يتعمل على برامج كتير مش مجرد برامج السوشيال ميديا بس
– ميزة ال Second space اللى بتعمل فيها تقريبا موبايل تانى جوا موبايلك ممكن تخصصها للشغل او للترفيه او لبياناتك الخاصه او حتى لشخص تانى يستخدم الموبايل
– برنامج ال Security app اللى بتقدر من خلاله تمسح الملفات اللى مالهاش لازمه .. تتابع استهلاك البرامج للبطاريه و الداتا وتحط ارقام في البلاك ليست..
– تقدر تسجل المكامات من الجهاز نفسه من غير ما تنزلها برامج مخصوصه و تقدر تخلى الموبايل يسجل المكالمات اللى جايه من رقم محدد بس
– تقدر تسجل الشاشه كمان من الجهاز على طول من غير برامج
– تقدر تاخد سكرين شوت عن طريق انك تعمل Swipe ب 3 صوابع على الشاشه ..
– تقدر كمان تقفل التطبيقات بباسوورد
– دا غير كمان ميزة ال Face Unlock اللى بقت متاحه عادى و انت عامل الدوله على مصر بعد ما كان لازم تحولها على الهند الأول عشان تلاقى الميزه موجوده في الاعدادات
– سلايدر الكاميرا تقدر تتحكم فى الصوت اللى بيعمله وهو بيطلع و بيدخل و كمان تقدر تشغل او تقفل الإضاءه بتاعته زى ما انت حابب
– بما ان الموبايل اموليد فهتلاقي فيه خاصيه ال Always On Display و شاومى حاطه اشكال كتييير ليها تقدر تغيرها و تختار منها اللى عاجبك ..
– الواجهه كمان فيها حاجه اسمها ال Game Turbo ودى بتخلى الجهاز يركز انه يقدملك افضل اداء فى اللعبه اللى فاتحها و كمان شويه مميزات زى انك تعرف استهلاك المعالج وال GPU وكمان بتقدر منها تقفل الاشعارات اللى بتجيلك و انت فاتح اللعبه و هكذا ..

ولكن مع الاستخدام المكثف للموبايل لقيت فيه شويه مشاكل كدا خلينى اقولك عليها
– لما تبدل الأزرار اللى تحت بال gestures هتلاقى ان الانميشن بتاعتها بيظهر فيها شويه تقطيع على خفيف جدا خصوصا لما تفتح ال recent apps
– لما بتكون مشغل ال Auto Rotation هتلاقى ان الموبايل ممكن يلف الشاشه لوحده بالعرض و انت ماسك الموبايل بالطول و مش عارف دا ليه بيحصل الحقيقه
– بما ان الجهاز بشاشه اموليد ف فيه اوبشن لل Always on screen .. وعادة لما الموبايل بيعرضها بيكون مقلل سطوع الشاشه عن الطبيعى لتوفير البطاريه .. ولكن لما بتفتح الموبايل وهو على ال Always on screen أحيانا السطوع بيفضل زى ما هو ومش بيرجع للدرجه اللى ظابطها من شريط الاشعارات .. ولكن الموضوع دا مش بيتكرر كتير

بشكل عام اداء الواجهه كويسه جدا و سلس و مواصفات الجهاز مساعده على كدا و المشاكل دى ممكن تتصلح بأبديت بسيط ..

اداء هاتف mi9t

تعالا بقى نتكلم عن الأداء .. لان الموبايل هنا جاى بمعالج تانى مره نشوفه في تليفون في مصر هنا وهو ال سنابدراجون 730 و دا اللى موجود في الجلاكسي ال A80 اللى بأكتر من 10 تلاف جنيه !! 

المعالج دا جاى معاه رامات 6 جيجا LPDDR4X بتردد 1866 وكمان معالج رسوميات ادرينو 618

السنابدراجون 730 بيكون ثماني الانويه .. اتنين منهم بتردد 2.2 و ال 6 الباقيين بتردد 1.8 جيجاهيرتز

والمعالج دا تقدر تقول انه في كل ظروف الاستخدام “الا الألعاب” هيديك أداء مماثل لمعالجات اعلى منه زى ال 845 مثلا .. سرعه فتح التطبيقات و التبديل ما بينها و كل حاجه هتعملها على التليفون هتلاقى ان المعالج دا اكتر من كافى ليها ..

كمان RAM Managment في الموبايل كويسه و البرامج بتفضل موجوده في الخلفيه لمده كبيره خصوصا ان رام الجهاز 6 جيجا ..

بشكل عام الواجهه متوافقه بشكل كبير مع الهاردوير وبتديك تجربه أداء تكاد تماثل أجهزة الفلاجشيب 👌

تعالا بقى نتكلم عن أداء معالج الرسوميات ادرينو 618 في الألعاب

الموبايل عموما أدائه ممتاز جدا على الألعاب المتوسطه و الأقل منها .. ومع الألعاب التقيله هيديك أداء محترم وحلو جدا .. اينعم مش هيكون زى اجهزه الفلاجشيب ولكن الأداء عموما هيكون ممتاز جدا على فئة الجهاز السعريه ..

الموبايل هيقدر يشغل pubg على اعلى اعدادات للجرافيك .. وتقريبا مش هتشوف فريما تبتقع وقت اللعب .. ودى حاجه كويسه

وطبعا معالج زى دا هيقدر يشغل فورتنايت عادى جدا 

كاميرا هاتف mi9t

نيجى بقى للكاميرا السيلفى المدفونه في الموبايل واللى بتيجى بدقه 20 ميجابيكسل وبفتحة عدسه f2.2

وقبل ما أتكلم علي أداء الكاميرا محتاج أتكلم عن حاجتين الأول
1- الكاميرا وهى طالعه بتنور .. اااه بتنور 
يمين وشمال سلايدر الكاميرا بلاستيك شفاف بيكون فيه لمبه بتنور باللون الأحمر و انت بتفتح او بتقفل الكاميرا .. و سلايدر الكاميرا من فوق بقى فيه جزء صغير مدور على شكل دايره شفاف بيظهر الإضاءه اللى تحته و شاومى هنا قالت انها هتعمله لمبة اشعارات و الحقيقه يعنى بالرغم من ان شكلها حلو الا اننا متعودين اننا نشوف لمبه الاشعارات دى في واجهة التليفون مش فى الفريم بتاعه .. ودا هيخليك تنسى انها موجوده من الأساس 

2- مدى اعتمادية سلايدر الكاميرا وهل يستحمل ولا لأ .. شاومى بتقول ان السلايدر دا يستحمل انك تفتحه 300 الف مره .. وبحسبه بسيطه لو انت فتحته 100 مره في اليوم ف المفروض انه يستحمل معاك لحد 8 سنين استخدام و دا رقم كويس جدا .. الموبايل كمان فيه مستشعر التسارع اللى لو حس ان الموبايل بيقع و انت فاتح الكاميرا بيسحبها على طول عشان يحافظ عليها .. و دا كمان كويس وبيحافظ على سيلايدر الكاميرا لمده أطول

على اى حال خلينا نكمل كلام على الكاميرا السيلفى نفسها
و اللى في ظروف الإضاءه القويه كانت كويسه جدا .. التفاصيل ظاهره وحتى لو بتتصور والشمس في وش الكاميرا .. الموبايل هيقدر يطلع صور مقبوله جدا بال HDR ولكن مش مميزه لدرجه انى اشكر فيها ..

وضع البورتريه كمان بيطلع صور بعزل حلو جداا جداا جداا ولاحظ انى قولت 3 جدا  لان العزل هنا بدون أخطاء تقريبا مع انه معتمد على السوفتوير بس .. ف شاومى حسنت الموضوع دا بشكل كويس جدا ..

اما بقى في ظروف الاضائه المتوسطه اللى هي اضاءه الغرفه عادى .. الموبايل بيقدر يطلع صور افضل من المتوسطه ولكن فيها 3 عيوب ..

– الأول هو انك أحيانا بتحس انك لون البشره باهت شويه عن الحقيقه .. – التانى هو انك بتلاقى نويز ظاهره شويتين تلاته كدا خصوصا في الحتت الغامقه وكإن الموبايل مش بيحاول يعالج الصوره و ينعمها شويه عشان يخفى النويز دى ..
– اما العيب التالت وهو ان جوده العزل في الصور البورتريه كمان بتبدأ تقل شويه ولكن بشكل مش كبير

اما في ظروف الاضاءه الضعيفه ف هتلاحظ ان التفاصيل بدأت تقل بالإضافه للنويز اللى بتكون موجوده بشكل اكبر وكمان جودة العزل بتقل شويه كمان

بص بشكل عام أداء الكاميرا السيلفى هنا من كتر تحمس الناس للجهاز و كلام الشركه عنه هيوصلك إحساس انه كان المفروض يكون احسن من كدا ولكن دا مش هينفى ان الكاميرا هتظل بتقدم أداء مابين المتوسط و الممتاز و دا يعتبر أداء كويس عموما في الفئة السعريه اللى نازل فيها الجهاز.

هتلاقى هنا امثله لصور الكاميرا السيلفى لهاتف mi9t بدقتها الكامله لو عاوز تشوفها
http://bit.ly/33bEluL

أما الكاميرات الخلفيه لهاتف mi9t فهما الحقيقه 3 كاميرات ..
– الأولى بدقه 48 ميجابيكسل وبفتحة عدسه f1.75
– التانيه كاميرا بزاويه عريضه بدقة 13 ميجابيكسل وبفتحه عدسه f2.4
– اما التالته الكاميرا التليفوتو ودى بدقة 8 ميجابيكسل و بفتحة عدسه f2.4

ولا واحده من التلاته فيها OIS ودا الطبيعى في الفئة السعريه دى
في البدايه الكاميرا الأساسيه ال 48 ميجابيكسل بتيجى بمستشعر جديد من سونى وهو ال IMX 582.. والحقيقه المستشعر دا هو هو ال IMX 586 اللى موجود في ال K20 Pro ولكن كل الفكره ان ال 582 مش بيدعم تصوير 4K بمعدل 60 اطار في الثانيه .. لان اخره 30 اطار في الثانيه.. والحقيقه اللى عملته شاومى هنا واختيارها للمستشعر دا كان منطقى جدا خصوصا لما تعرف ان المعالج اللى في الجهاز “سنابدراجون 730” الحد الأقصى لتصوير ال 4K فيه هو 30 اطار في الثانيه ..وبغض النظر عن المستشعرات خلينى اقولكوا على أداء الكاميرا الحقيقى عامل ازاى ..

أولا في ظروف الإضاءة القويه
– الكاميرا الاساسيه بتطلع صور بتفاصيل حلوه جدا 👌 ولكن اللى لاحظته ان الألوان في كتير من الأحيان بتكون مشبعه اكتر من الطبيعى .. ودا بيظهر اكتر مع وضع ال HDR و اللى الحقيقه بيحسن الصور اللى بتطلع من الكاميرا و لكن بفرق مش كبير

– الكاميرا اللى بزاويه عريضه ودى صورها بتطلع بتفاصيل مقبوله لانها بتميل للنعومه اكتر من اظهار التفاصيل .. ومع تشغيل ال HDR الدنيا بتتحسن شويه و الأماكن اللى فيها ظل بتظهر الى حد ما ولكن الأماكن اللى فيها الوان فاتحه اكتر زى الأبيض ممكن تلاقيها “ملسوعه” شويتين

– الكاميرا اللى بزوم التيلى فوتو تفاصيلها مقبوله بشكل كبير ولكن مع تشغيل ال HDR بتلاحظ في بعض الصور انها مصفره شويه ودا تحديدا لما بتصور في الشمس .. الموضوع مش بيظهر في كل الصور ولكنه موجود ف الأفضل لو بتصور بيها خد اكتر من صوره عشان تختار منهم الأفضل بعد كدا

——————

خلينا بقى نروح على ظروف الإضائه المتوسطه والأقل

– الكاميرا الأساسيه هنا بتستفيد بشكل حلو قوى من فتحة العدسه الواسعه نسبيا وكمان من ال 48 ميجابيكسل وبتضم كل اربعه منهم سوا عشان يبقوا بيكسل كبير ويشوف اضاءه اكتر .. و الموضوع دا واضح في الصور بشكل كبير و التفاصيل بتكون ظاهره بشكل كويس و النويز من اقل ما يمكن و بتزيد شويه على حسب قلة الإضاءه في المكان اللى بتصور فيه ..

– الكاميرا اللى بزاويه عريضه بيكون الموضوع معاها مختلف لان بطبيعه فتحة العدسه الضيقه بتاعتها ف السينيور مش بيوصله اضاءه زى السينسور بتاع الكاميرا الأساسيه .. فهلاقى الصور في ظروف الإضاءه المتوسطه ناعمه جدا و التفاصيل مش بتكون ظاهره بأفضل شكل ممكن .. و لما الإضاءه بتقل كمان لازم تظهر نويز .. و الموبايل بيحاول يخفيها من خلال تنعيم الصوره اكتر ولكن النتائج النهائيه بتكون مش مرضيه والصوره بتكون انعم من اللازم

– الكاميرا التليفوتو بقى لما هتحاول تصور بيها بورتريه في ظروف الاضاءه الأقل من المتوسطه و القليله هتلاقى الصوره مليانه نويز الحقيقه و مش مرضيه اطلاقا.. ف انصحك لو تستخدمها في النهار يكون افضل بكتير ..

كدا انت عرفت أداء كل كاميرا من التلاته في ظروف الإضاءه المختلفه ومش باقى بس الا انى اقولك ايه اخبار الوضع الليلى اللى الحقيقه النتائج بتاعته كانت حلوه جدا 🤩 والموبايل بيعرف يعالج الصور المختلفه اللى خدها بشكل ذكى بيحافظ من خلاله على التفاصيل وبيحاول يشيل النويز من غير ما يأثر عليها ودا ممتاز ..

أداء الكاميرا الليلى الحقيقه بالرغم من انه مش الأفضل في السعر الا انى شايف انه خطوه كويسه قوى لشاومى بتقولنا من خلالها انها تقدر تقدم تصوير ليلى محترم في الفئة السعريه اللى نازل فيها الجهاز ..

ملحوظه اخيره .. كلامى عن الكاميرا ممكن يبين انها مش حلوه لبعض الناس .. كل الفكره انى بتكلم عليها بشكل نقدى عشان اقولكوا بالتفصيل تجربه الكاميرا عامله ازاى ..

ولكن عموما أداء الكاميرا عجبنى بشكل كبير و كمان مع باقى مواصفات الجهاز مقابل السعر اللى نزل بيه شايف انه بيصنف الجهاز كأفضل قيمة مقابل السعر في الفئة دى ..

هتلاقى هنا امثله مفصله لتجربه ال 3 كاميرات الخلفيه في التليفون
http://bit.ly/2LYcxob

الزتونة بقى .. مميزات وعيوب الجهاز

* نبدأ بالعيوب اللى كنت أتمنى عدم وجودها
– مش بيجى مع الجهاز سكرين على الشاشه
– الجهاز مفهوش مكان لتركيب كارت ميمورى 
– الانميشن محتاجه تتظبط اكتر من كدا شويه خصوصا اللى بتظهر لما بتفتح ال recent apps
– الكاميرا الأماميه كنت أتمنى انها تقدم أداء افضل شويه
– بعض المشاكل اللى في الواجهه و اللى ممكن هتتحل بأبديت عادى زى مشكله ال Auto rotation اللى اتكلمت عليها فوق
– الوان الظهر بتاعة الجهاز كنت أتمنى ان شكل انعكاسها يكون مختلف عن كدا شويه “رأى شخصى مش عيب في الموبايل”

*اللى عجبنى فى الجهاز بقى كان
– أداء البصمه بإعتبار انها في الشاشه و في جهاز من الفئة المتوسطه
– صوت سماعة الجهاز عالى وواضح جدا والجوده بتاعته جيده الى ممتازه
– سلاسه الواجهة عموما في التعامل
– أداء الكاميرا الخلفيه على وضع ال 12 ميجابيكسل و الوضع الليلى كمان
– الشاشه ال AMOLED الكامله اللى بدون حواف او خرم او نوتش
– وجود شاحن سريع في العلبه مع الموبايل
– جوده المواد المصنع منها الموبايل سواء الزجاج او الفريم المعدن

بس تعالا اقولك على الزتونه كدا 
الموبايل دا ممكن يتبصله من وجهتين نظر

1- الأولى هو الشخص اللى هيقول منا اروح اجيب البوكوفون ارخص وبمعالج احسن ..
ودا الحقيقه كلامه هيكون صح في حاله واحده بس .. وهى ان اغلب استخدامك للموبايل يكون العاب .. انما لو شخص عادى بيلعب على الموبايل اه بس مش كتير ف ال Mi9T بيقدم تجربه استخدام افضل اعتمادا على مواد التصنيع و الشاشه ال amoled الكامله وكمان وجود كاميرا وايد زياده .. ف بالتالى كتجربة استخدام عموما مش بتعتمد على الألعاب ال mi9t هيقدم قيمه افضل

2- التانيه وهى مقارنة الموبايل مع الاجهزه اللى في نفس فئته السعريه من الشركات التانيه زى ال oppo f11 pro ولو انه اغلى شويه و كمان ال Galaxy A70 .. كلا الجهازين دول فيهم معالجات اقل بفرق مش صغير عن اللى موجود في ال mi 9t و الكلام دا يطبق على معالج الرسوميات بردو ..

دا غير الكاميرا ال الترا وايد اللى افضل من اللى في السامسونج واللى مش موجوده أصلا في ال اف 11 برو

وكمان مواد التصنيع البلاستيك في الجهازين مقابل المعدن و الزجاج اللى في ال mi 9t …

كلا الجهازين ال اوبو و السامسونج يظل ليهم نقاط قوه زى السامسونج اللى بيجى بشاشه اكبر وبطاريه اكبر وشحن اسرع 25 وات .. و كمان الاوبو اللى أداء الكاميرا فيه افضل شويه وكمان شحن اسرع

ولكن لما تبص لل 3 اجهزه وتشوف مواصفاتهم بشكل عام في مقابل سعرهم هتلاقى ان ال mi 9t بيقدم افضل باكيدج مواصفات مقابل السعر اللى بتدفعه
وفى اعتقادى اكتر حاجتين هيخلوا ناس كتير تميل للجهاز دا عن غيره هو المعالج الأفضل و البيلد كواليتى المحترمه بتاعته 👌

الجهاز موجود بنسختين 6 جيجا رام ولكن واحده 64 جيجا ب 5666
و التانيه 128 جيجا ب 5999
هتلاقيهم هنا
https://souq.link/3366DX9 مصر

https://amzn.to/2YHzXUJ امريكا

السعودية

الامارات

بااااس .. انا كدا خلصت  …
انا عارف ان غالبا عندك سؤال او اكتر عن الموبايل .. اكتبه تحت في التعليقات وانا هجاوبك عليه في اقرب وقت ان شاء الله

Review By : Mohamed El-Khayat

تنقيح ihab

Like it? Share with your friends!

0

Comments 0

لن يتم نشر عنوان بريدك الإلكتروني. الحقول الإلزامية مشار إليها بـ *

شاومي MI9T هل يستحق الشراء – مراجعة شاملة